Duha ka BHW gireklamo kay mibalibad pagbakuna

CEBU, Philippines - Milusad og imbestigasyon si Mandaue City Health Officer Dr. Edna Seno batok sa duha ka health workers sa Barangay Jagobiao nga gireklamo sa usa ka amahan nga mibalibad sa pagbakuna sa anak niini.

Ang mireklamo nga amahan mao si Ruben Licera mialigar nga unang gidala sa iyang katabang sa barangay hall ang iyang anak aron mapabakunahan apan mipauli kini nga wala bakunahi ang bata.

Dihang pagkasunod adlaw ang amahan na mao na g’yud ang midala sa iyang anak sa barangay health center aron lang mabakunahan kini apan gibalibaran tungod kay walay magamit nga medisina alang niini.

Sumala pa nga gipangatarungan sa duha ka health worker nga ang tambal nga available niadtong higayona alang lamang sa mga nagsabak nga inahan nga ilang bakunahan ug magpaabot na lamang kun adunay sobra. Si Roger Paller nga maoy tigpamaba sa kagamhanan sa maong dakbayan nga nahinabi sa Banat News miingon nga si Mayor Jonas Cortes mitahas na kang  Seno sa paghimo og pakisusi sa maong reklamo.

Gipatawag na ang duha ka health workers sa iyang buhatan alang sa pagkuha og mga kasayuran labot sa maong reklamo. Wa pa  mahibaw-i ang resulta sa imbestigasyon. (Romeo T. Limpangog/EIM)(BANAT NEWS)