Walay pili bisa’g buta gilugos

CEBU, Philippines - Buta nga babaye gilugos sa iyang silingan nga nagpatuo nga mao kini ang iyang kapuyo.

Sa una’ng higayon milampos ang suspek nga si Mario dela Peña pag-angkon sa pagkababaye sa buta niya’ng silingan apan kaniadto’ng Lunes nasakpan na g’yud siya sa babaye nga dili kini ang iyang kapuyo.

Didto kini mahitabo sa Barangay Lamacan, Argao ug gituohan nga ang 36-anyos nga suspek nagpaniid lang nga molakaw ang kapuyo sa babaye ug moadto siya dayon sa balay niini.

Matud ni PO2 Paulino Sanchez sa Argao Police nga base sa imbestigasyon nga gihimo ni PO3 Ivy Mae Catipay sa Womens Desk Section nga unang gihimo sa suspek ang pagpanglugos niadtong Domingo sa gabii human nga milakaw ang kapuyo sa buta. Sumala ni PO2 Sanchez nga wala g’yud nakabantay ang buta nga dili diay ang iyang ka live-in partner ang nakighilawas kaniya. Apan pagka Lunes sa buntag nga ang kapuyo sa biktima may gilakaw, ang suspek nga si Dela Peña miadto na usab sa balay. Matud pa nga misulay na pud unta si Dela Peña pagsulod sa balay aron subli nga makighilawas apan ang biktima nakabantay nga dili kini iyang ka live-in partner mao nga mibalibad.

Sigun sa pakisusi sa kapolisan nga ang biktima misukol sa iyang silingan aron dili siya maamong-amongan apan gibukbok na hinuon siya sa suspek mao nga misinggit ang babaye ug nangayo’g tabang.

Ang singgit sa biktima nadunggan ni Konsehal Richie Sanchez mao nga nagdali ang polis nga miresponde ug nasikop ang suspek. Matud sa kapolisan nga dugay ra nga naniid ang suspek ug naghuwat lang og maayo nga higayon. (BANAT NEWS)