80 ka balay naugdaw

CEBU, Philippines - Gibana-banang 80 ka mga panimalay ang naugdaw, human moulbo ang usa ka dakong sunog sa Barangay Luz, Cebu City kagahapon sa alas 3:27 sa hapon.

Tulo ka mga sitio ang apektado sa maong sunog  nga mao ang Sitio Abellana, Sta. Cruz ug Sto. Niño, ang Sitio Abellana maoy labing apektado.

Matud pa ni City Fire Marshall Rogelio Bongabong nga miabot sa Task Force Alpha ang maong sunog ug nadeklarar nga under control  paglabay sa kapin 50- minutos.

Sumala pa ni Bongabong nga sa panimalay ni Mario Villaflor gikatahong nagsugod ang maong sunog apan gisubay pa kung unsay sinugdanan niini.

Sumala pang Bongabong, dunay miingon nga usa ka buto ang ilang nadungog sa wala pa nahitabo ang sunog ug duna sa’y miingon nga gikan sa kable sa kuryente ang kalayo.

Tunga-tunga sa interview sa mga tigbalita kang Bongabong, usa ka lalaki nga nanimaho sa ilimnong makahubog ang miduol ug gisinghagan si Bongabong.

‘Wala’y pulos nang interview, interview, walay tubig ang fire truck pag abot, ug naa pa dili unta modako ang sunog,” sigun pa sa maong lalaki nga dali ‘sab nga gipadaplin sa mga pulis ug gipalayo sa lugar, nasayran sa Banat News nga kanhi fire volunteer ang maong lalaki.

“Sabton na lang nato ‘to siya kay nasunogan man gud’ to” matud pa ni Bongabong.

Gihimakak hinuon dayon ni Bongabong ang alegasyon sa maong lalaki, nagtuo siya nga dali nga nahurot ang tubig sa unang miabot nga bombero tungod sa kadako sa maong sunog.

Ang acting barangay kapitan sa maong barangay nga si konsehal Jerome Pagador miingon nga mopatawag kini og tigum sa iyang mga kauban sa barangay aron masabotan nga ipaubos sa “state of calamity” ang maong lugar.

Sa sports complex una gipahiluna ang dul-an 200 ka mga pamilyang nasunogan

Si acting mayor Edgardo Labella nga mibisita ‘sab sa lugar ug mipasabot nga gipanag- iya sa city government ang yuta sa maong lugar ug mahimo ra silang makabalik og tukod og balay human sa himoon nga re-blocking.Gisusi pa kung dunay naangol o nakalas sa maong hitabo. (BANAT NEWS)