Kapin 100 mil sa sugbo mobotar sa SK elections

CEBU, Philippines – Gibanabanang kapin sa usa ka gatos ka libo ka mga batan-on dinhi sa lalawigan sa Sugbo ang kwalipikadong makabotar sa piniliay sa Sangguniang Kabataan (SK) sa sunod tuig.

Kini human gitapos kagahapon ang SK special registration sugod niadtong Septiyembre 20 hangtod kagahapon.

Niadtong Domingo, miabot og 30,485 ka mga batan-on ang nakapa-rehistro samtang padayon pang gi-assess sa Cebu Provincial Comelec ang resulta sa katapusang registration kagahapong adlawa.

Gibana-bana nga moabot pa og kapin 10 mil ang magparehistro lukop lalawigan kagahapon sa katapusang adlaw sa registration.

Gitug-an sa Election Assistant sa Comelec Cebu, Arthur Patiga, nga niadtong 2010, niabot sa 101,142 ang narehistro sa SK dinhi sa Sugbo.

Posible kining malabwan sa 2015 SK Elections sanglit duna pa may 83,970 ka mga rehistrante niadtong tuig 2013 nga kwalipikadong makabotar sa sunod nga tuig. Sila maoy mapuno sa kapin 30 mil nga na-rehistro niadtong Septiyembre 20 hangtud na kagahapong adlawa. -/EIM) (BANAT NEWS)