Insp. Amoroso gikasohan na
CEBU, Philippines – Gipasakaan na og kasong frustrated murder ug murder si Police Inspector Rogelio Amoroso kinsa nakapusil patay sa waiter ug nakaangol sa bouncer sa Lotus Restobar sa Basak, dakbayan sa Lapu-Lapu.
Si Atty. Leo Castañares ang niduso sa kaso nga gipasaka sa pamilya sa namatay nga si John Stephen Lagsanay ug sa naangol nga si Archie Gesta.
Matud ni Castañares nga nakadawat na sila sa CCTV footage sa nahitabong pagpamusil.
Samtang daku ang posibilidad nga matangtang sa serbisyo si Amoroso. Matud sa deputy director sa Regional Investigation and Detection Management Division (RIDMD-7), Supt. Henry Biñas, nga base sa report sa media, daku ang posibilidad nga mahulog nga grave misconduct ang kasong administratiba nga atubangon ni Insp. Rogelio Amoroso nga sakop sa Lapu-Lapu City Police Office.
Ang kasong grave misconduct adunay maximum penalty nga pagkatangtang sa serbisyo kung mamatud-ang guilty sa pasangil.
Usa sa gipaabot sa RIDMD-7 ang mga ebidensiya nga iduso sa LCPO aron ila na nga masugdan ang pre-charge evaluation sa kaso batok ni Amoroso.
Samtang si Police Regional Office-7 Director, Chief Supt. Prudencio Bañas, misaad nga wala’y special treatment ang ilang imbestigasyon sa kaso ni Amoroso. Gipasabot ni Bañas nga ang kasong administratiba ug kriminal ang mapasaka gyod batok sa maong polis gumikan sa krimen nga nahimo niini.
Patay ang usa ka waiter nga si Stephen Lagsanay, 18, human kini gipusil sa liog ug naangol sab ang bouncer nga si Archie Gesta, 37, human nagkainitay ang bouncer ug polis nga misangpot sa pagpamusil. -/GMR) (BANAT NEWS)
- Latest
