2 Ka nurse, kolektor gitulis
CEBU, Philippines - Midangop sa Fuente Police Station ang duha ka nurse human gitulis sa duha ka mga tulisan sakay sa usa ka Public Utility Jeep (PUJ) sa may General Maxilom Avenue, Kamputhaw, dakbayan sa Sugbo alas 10:30 sa gabii niadtong Sabado.
Ang mga nagpakitabang sa kapolisan mao sila si Sheila Rivalde, 24, nagpuyo sa Suran, Kinasang-an, Pardo ug si Scarlet Inajad, 24, taga Guadalupe.
Sa imbestigasyon sa kapolisan nasayran nga nisakay ang duha ka mga suspek gikan sa I.T Park apan pag-abot sa maong lugar dali nga mideklarar og hold-up gamit ang kutsilyo.
Nakuha sa mga tulisan ang mga cellphones, cash ug mga importanteng IDs.
Gihulagway nga nagsuot og pula nga jersey ug blue nga T-shirt ang duha ka tulisan.
Samtang usa sab ka collector ang midangop sa Mambaling Police niadtong Sabado sa hapon human gitulis sa duha ka mga lalaki nga armado og revolver.
Ang biktima naila nga si Hermes Jongoy, 48, taga Pajac, Lapu-Lapu City. Matud pa sa biktima nga samtang kini miparking duol sa usa ka bakeshop sa may N. Bacalso, Basak San Nicolas, duha ka lalaki ang miduol dayon tion sa revolver ug gikuha ang iyang dala nga sling bag nga dunay sulod nga P25,000, kuwarta nga personal nga P3,775 ug mga importanteng ID’s.
Human sa insidente, daling misibat sakay sa motorsiklo sa biktima nga Honda Wave nga may plate number nga IK-9324 ang mga suspek. (BANAT NEWS)
- Latest
