Nagparehistro sa SK nagpunsisok
CEBU, Philippines - Nagtapok ang mga batan-on nga niparehistro alang sa eleksiyon sa Sangguniang Kabataan (SK) niadtong Sabado samtang gitakda ang katapusang adlaw karong adlawa.
Si provincial election assistant Arthur Patiga nagkanayon nga adunay 21,895 ka batan-on ang nagparehistro sa tibuok probinsiya.
Mitagana lang og 10 ka adlaw ang Commission on Elections sa pagparehistro gikan sa Septiyembre 20 hangtud 29 samtang abli sila sa adlaw’ng Sabado ug Domingo alang sa mga estudyante.
Daan na nga gibutyag ni Provincial Election Officer Ferdinand Gujilde nga posibleng dili na mauswag ang pagparehistro.
Subay sa balaud, wala’y himuong pagrehistro sulod sa 120 ka adlaw sa dili pa ang piniliay.
Matud ni Gujilde nga ang ubos nga gidaghanon sa mga nagparehistro tungod kay nakarehistro na ang uban niadtong Hulyo samtang ang uban wala’y interes sa kalihukan.
Ang SK elections gitakda unta niadtong Oktubre sa miaging tuig apan giuktaba kini aron paghatag og kausaban sa kasamtangang sistema niini. Gitakda ang SK eleksiyon karong Pebrero 21. (BANAT NEWS)
- Latest
