9 nadakpan, armas, drugas, kutsilyo nasakmit

CEBU, Philippines - Nasikop sa taga Mobile Patrol Group ang duha ka lalaki nga gigukod sa mga polis ug nakuhaan og armas ug drug paraphernalia sa Guadalupe, Cebu City niadtong Huwebes sa kaadlawon.

Ang mga nasikop mao sila si Gabriel Tampon, 25 ug Freddie Alcuirez, 25, pulos taga Upper Laguna Green Hills, San Fernando.

Nagpatrolya ang mga sakop sa MPG nga gipangulohan ni PO2 Gerry Molina ug ilang nakita ang usa ka motorsiklo nga dunay sakay nga tulo ka lalaki ug kadudahan ang lihok.

Gikan sa Fortich Street, Banawa ang motorsiklo ug gisundan sa MPG apan pag-abot sa may Pavillion Mall, kalit miambak ang duha ka back riders ug midagan paingon sa V. Rama ug ang drayber sa motorsiklo ang mipasutoy og dagan.

Daling gigukod sa kapolisan ang duha ka lalaki ug nadakpan. Nakuha gikan kang Tampon ang .38 snub nose revolver nga dunay lima ka bala ug nakuha gikan ni Alcuirez ang duha ka linukot nga aluminum foil ug usa ka disposable lighter.

Samtang upat usab ang nasikop sa City Intelligence Branch sa Cebu City Police Office sa operasyon sa  Pit-os, Talamban, kagahapon sa alas 12:30 sa udto.

Target sa operasyon mao ang mga magtiayong Michael ug Aidel Uy, Onel ug Lina Codilla, ug Paul Gerona nga giingong mga level 2 drug pushers ug gihulagway nga “untouchable” sa mga residente.

Atol sa pagronda, moabot sa P150 mil nga drugas ang ilang nakuha sa tulo ka panimalay nga naglakip sa nubain ug shabu diin ang mga shabu nga nakuha sa balay nilang Codilla ang gipangbutang ilawom sa stuff toys samtang sa panimalay ni Uy nakuha ang mga nubain.

Sa panimalay ni Gerona usab nakuha ang ubang drugas diin nasakpan ang upat ka lalaki nga nag-pot session nga naila nga sila si Dante Ermac ug Eugene Agbay, taga Consolacion; Eddie Bontilao nga taga Tigabao, Talamban ug John Gerona, ig-agaw sa tag-iya sa balay.

Ang lima ka target sa CIB ang nakaikyas gumikan sa pagbundak sa kusog nga uwan.

Samtang ang City Anti-Illegal Drugs Special Operations Task Group (CAIDSOTG) sa CCPO ang nakasikop sab sa usa ka notadong tigpayuhot og drugas sa A. Lopez, Calamba. Ang nasikop naila nga si Joseph Hermosa, 21, ulitawo nga nagpuyo sa maong lugar.

Nakuha sa kapolisan gikan ni Hermosa ang 56 ka gagmay’ng pakete sa drugas nga duna’y kantidad sa kapin P11 mil.

Sa dakbayan sa Mandaue, duha ka tawo ang nadakpan ug nasakmit ang pinaketeng shabu, armas de fuego ug kutsilyo sa managlahing dapit.

Sa sitio Ilang-Ilang, Opao, nadakpan si Jennifer Lanoy, 28, ug nakuhaan og usa ka medium nga gidak-ong putos sa shabu, 15 ka gagmay nga pakete ug .22 magnum nga puno sa mga bala ug mga drug paraphernalia.

Ang ikaduhang nadakpan mao si Miguel Damaoloa, 33, taga Sitio San Lorenzo, Cambaro, nga nasakmitan og kusilyo ug tulo ka paketeng shabu. (Jojo C. Ugdol ug Romeo T. Limpangog/GMR)(BANAT NEWS)