Sonny o, kaubanan kasohan gyud
CEBU, Philippines - Ipadayun gyud sa buhatan sa Ombudsman-Visayas ang pag-imbestigar sa kasong kriminal ug administratiba batok kang Toledo City Mayor John Henry “Sonny” Osmeña ug kaubanan.
Kini human nakakita ang maong buhatan og lig-ong sukaranan sa pagpadayun sa imbestigasyon sa kasong gipasaka sa unom ka konsehal sa dakbayan.
Upat ka managlahing kamandoan ang giluwatan nilang acting Evaluation and Investigation Office (EIO) Team B Director Jane Aguilar ug acting EIO Director Euphemia Bacalso sa pagpaduso sa tubag sa mga sinumbong.
Si Aguilar nimando kang Osmeña, Bise Mayor Antonio Yapha Jr., ug Konsehal Leo Dolino, Zosimo Abellanosa ug Merly Abad pagtubag sa kasong kalapasan sa Local Government Code ug abuso sa gahum.
Samtang si Bacalso nimando kang Osmeña pagtubag sa kasong ilegal nga paggamit sa pondo ug butang sa gobyerno ug misconduct. Ang mga sinumbong gihatagan og napulo ka adlaw sa pagtubag sa mga reklamo.
Sila si Konsehal Ricardo Pepito, Antonio Borja Jr., Rogelio Caburnay, Louis Nicholas Espinosa, Helen Jill Espinosa ug Edgardo Aguilar unang niduso sa tulo ka sumbong batok kang Osmeña ug kaubanan.
Kini may kalambigitan sa giingong pagpasar sa 2014 budget nga wala’y korum, ug pagpugong sa sweldo sa mga trabahante niadtong Abril 1 hangtud 15, 2014.
Si Osmeña gikiha usab sa iyang paggamit sa Travelers’ Inn isip iyang buhatan nga wala’y pagtugot sa konseho ug sa katawhan. (Gregg M. Rubio)(BANAT NEWS)
- Latest
