Kaso gipasaka na batok taga HPG-7
CEBU, Philippines - Kasong multiple murder ug frustrated murder ang gipasaka batok sa tulo ka opisyal sa Regional Highway Patrol Unit (RHPU)-7 may kalambigitan sa pagbanhig-patay kang Atty. Noel Archival niadtong Pebrero 18.
Si acting Provincial Prosecutor Jesus Rodrigo Tagaan ang mipasang-at sa kaso batok nilang Senior Superintendent Romualdo Iglesia, Senior Inspector Joselito Lerion ug PO1 Alex Bacani sa Regional Trial Court sa lungsod sa Argao niadtong Miyerkules.
Kini human gibasura ni Tagaan ang omnibus motion sa mga akusado lakip na ang pagpa-inhibit kaniya sa kaso.
Wala’y piyansa nga girekomendar si Tagaan batok sa tulo ka akusado.
Si Iglesia, Lerion ug Bacani ang gitumbok nga suspek sa pagpatay kang Archival, drayber niini nga si Alejandro Jayme, bodyguard nga si Candido Miñoza ug samdan nga si Paolo Cortes.
Si Atty. Democrito Barcenas, usa sa abogado ni Archival, nagkanayon nga malipayon sila sa dagan sa kaso ug nagpasalamat sa gipakitang kaisog ni Tagaan.
Plano ni Barcenas nga ipabalhin ang husay sa kaso sa dakbayan sa Sugbo alang sa seguridad sa pamilya, abogado, testigos ug media.
Ang abogado sa mga akusado nga si Atty. Inocencio dela Cerna miduso usab og petition sa pagpugong nga maluwatan sa korte ang warrant of arrest samtang may pending usab nga motion sa pagpabasura sa kaso. (BANAT NEWS)
- Latest
