Cardinal Rosales Avenue sirad-an alang sa fun run

CEBU, Philippines - Usa ka rerouting ang ipatuman sa City Traffic Office Management (CITOM) karong Sabado, Septiyembre 27, 2014 tungod kay ang habig sa Cardinal Rosales Avenue sa Cebu Business Park siradohon gikan sa alas 4:00 sa kaadlawon hangtud sa alas 10:00 sa buntag alang sa ipahigayong annual fun run sa kalihukan sa Cebu Press Freedom Week.

Ang fun run magsugod kini sa alas 5:00 sa buntag ug sa nahisgutang adlaw ipahigayon ang pagpangrehistro ug pagpanghatag sa singlets sa mga moapil. Ang maong fun run duna lang kini 250 ka slots ug “first come, first serve” sa buot moapil.

Ang mga media men sa print ug broadcast organizations ang magsangka sa cardiovascular endurance, muscular strength ug flexibility sa Metafit Bio Challenge  diin ang mo-host niini mao ang coach sa Metafit Cebu ug winner sa Biggest Loser Philippines 2011 nga si Alan Chuachoy.

Dunay ipahigayong Zumba workout diha sa Linear Park alang sa mga team supporter. Ang Cebu Holdings Inc. uban sa Ayala Center Cebu, Marriot Hotel ug City Sports Club Cebu ang misuporta sa Cebu Press Freedom Run.  (BANAT NEWS)