Tubag sa polis nga nakadispalko gilugwayan

CEBU, Philippines - Gilugwayan sa Regional Investigation and Detection Management Division sa Police Regional Office -7 nga makaduso sa iyang tubag kadtong babayeng polis nga giingong nakadispalko og pundo nga alang unta sa mga biktima sa bagyong Yolanda.

Matud ni Senior Supt. Henry Biñas, deputy chief sa RIDMD-7, nga nakapadala na sila og memorandum sa maong policewoman nga nagmando nga mopakita kini og kompletong dokumento nga magpamatuod nga anaa ra ang kuwarta.

Deadline nga gihatag niadtong Martes apan gibutyag ni Biñas nga ila pa nga hatagan og sakto nga panahon ang maong policewoman aron gyud iyang mahatag ang gipangayo kaniya nga mga dokumento.

Sumala pa ni Biñas nga hangtud Lunes sunod semana ang gihatag nga tagal sa maong polis.

Sa kasamtangan usa ka fact-finding investigation ang gihimo sa maong buhatan aron pagsuta kung nagasto ba sa maong polis ang kuwarta.

Gihimakak na sa maong policewoman ang pasangil.

Gibutyag usab ni Biñas nga kung dunay makita nga insaktong basehan ang gihimong pasiuna nga imbestigasyon, ilang ipaubos sa pre-charge evaluation ang maong polis ug posibleng sundan kini sa summary hearing.

Dugang ni Biñas nga kung sa Lunes dili pa makahatag og dokumento ang maong polis ila’ng resolbahon ang maong isyu depende sa mga ebidensiya nga ilang makuha. (BANAT NEWS)