Nangawat og bangko gigukod sa guwardiya
CEBU, Philippines - Nagginukdanay ang duha ka guwardiya sa Social Security System (SSS) sa dakbayan sa Sugbo ug duha ka kawatan nga mikuha sa lima ka plastic nga bangko sulod sa compound sa maong buhatan.
Ang ginukdanay nahitabo gikan sa dalan P. Del Rosario paingon sa Cebu Coliseum kagahapon sa alas 12 sa tungang gabii.
Matud ni SPO4 Rene Cerna sa Carbon Police nga gumikan sa kabug-at sa dala nga bangko, usa sa mga suspek ang nadakpan gyud sa duha ka guwardiya.
Ang nasikop naila nga si Diosdado Bejer, 28, taga dalan Belgium, Pasil samtang ang kauban ang padayon pa nga giila sa kapolisan.
Ang guwardiya nga sila si Nerio Petarga ug Mario Lapos ang nakigginukdanay sa duha ka kawatan human ilang nakita nga gipangdala na sa mga suspek ang mga bangko nga plastic.
Daan na nga nakabantay ang duha ka guwardiya nga dunay dautang plano ang duha ka suspek.
Usa sa mga suspek ang mikatkat sa koral sa SSS ug mitunol sa iyang kauban sa mga bangko.
Dihang nakabantay sa mga guwardiya, daling misutoy og dagan ang usa sa mga suspek nga gibiyaan ang iyang kauban nga nag-aswat sa lima ka monobloc chairs.
Pipila ka metros ang gidagan ni Bejer nga nag-aswat sa mga bangko apan iyang gibilin ang duha ug misutoy og dagan dala ang tulo ka bangko.
Didto na duol sa Cebu Coliseum gibiyaan ni Bejer ang mga bangko ug mitago.
Usa sa mga guwardiya ang nakabantay nga si Bejer mipasok ilawom sa usa ka sakyanan ug dali kining giguyod ug nasikop.
Gitanggong sa Carbon Police ang dinakpan ug wala gyud kini mitug-an sa pangan sa iyang kauban. (BANAT NEWS)
- Latest
