Tejero may anti-trafficking ordinance na

CEBU, Philippines - Gipalabang sa konseho sa barangay Tejero, Cebu City ang Anti-Trafficking Ordinance isip suporta sa nasudnong balaud sa Anti-Trafficking in Persons Act of 2003. Tipik sa nahisgutang ordinansa ang pagprotekta sa mga residente batok sa pagpangabuso.

Niadtong tuig 2012 ang mga opisyal sa Tejero naalarma sa gipahigayong operasyon sa law enforcement agencies diha sa ilang barangay batok sa mga bugaw human giingong dunay mga menor de edad ang nalambigit sa prostitusyon.

Ang barangay makig-alayon sa mga hingtungdang ahensiya sa gobiyerno sa pagpatuman sa ordinansa.

Ubos sa maong ordinansa ang pagtukod sa Inter-Agency Task Force Against Trafficking in Persons nga maoy mopahigayun og koordinasyon sa lain-laing ahensiya sa gobiyerno ug sa non-government organization (NGO) aron mahatagan og suporta ang mga biktima sa trafficking ug masilotan ang mga makalapas sa balaud. Mas daku ang multa nga P1,000 sa usa ka opisyal kinsa dunay kasayuran sa trafficking apan mapakyas sa pag-report ngadto sa Barangay Inter-Agency Council Against Trafficking (BIACAT).

Kung ang hingtungdan usa ka pribadong indibidwal pabayron kini og P700 nga multa.

Ang barangay mogahin og P50 mil gikan sa pondo sa Gender and Development (GAD) budget alang sa pagpatuman sa ordinansa. Ang maong ordinansa i-review pa sa konseho sa dakbayan sa Sugbo pinaagi sa committee on laws. (BANAT NEWS)