P68M gahin pagtuon sa baha

CEBU, Philippines - Giaprobahan na sa Department of Public Works and Highways (DPWH7) ang gahin alang sa pagtuon sa kasapaan sa Sugbo aron dili na mobaha.

Ang public information officer sa DPWH-7, Marie Nillama, nitug-an nga ang P68 milyones nga giaprobahan sa ila ulohang buhatan gikuha sa ilang Preliminary Detailed Engineering Fund ubos sa 2014 Infrastructure Projects.

Ang kasapaan sa Carcar, San Fernando, Naga ug lakip na sa ubang lungsod ang posibleng apil sa himoong pagtuon aron masayran kun asa ang critical ug daling moawas panahon sa kusog nga mga pag-uwan.

Sayo niini ang Metro Cebu Development Coordinating Board (MCDCB) nihangyo sa DPWH-7 nga tun-an ang gagmay nga sapa diin sagad moawas ang tubig kun mobundak ang uwan hinungdan sa pagbaha sa kadalanan.

Si Nillama midugang nga ipaubos pa sa bidding ang P68 milyones aron masayran kun kinsang kompanya ang mohimo og pagtuon.

Wala usab mohatag og deadline ang DPWH-7 kun kanus-a mahuman ang local consultancy. (BANAT NEWS)