Garbage collector nag-motor gidunggab

CEBU, Philippines – Nalandig sa tambalanan ang usa ka 39-anyos nga lalaki human gidunggab sa kilid sa wala mailhing lalaki samtang ang backrider niini ang gisumbag sab sa nawong atol sa ilang paghunong sa traffic light sa eskina N. Bacalso ug V. Rama, Calamba, Cebu City, niadtong Domingo.

Ang mga biktima naila nga sila si Paquito Mendoza Jr., 30, taga Banawa nga nasukmagan sa nawong ug si Carlo Bacatan, garbage collector, taga Guadalupe kinsa nakaangkon og samad dinunggaban sa iyang kilid.

Sa imbestigasyon sa taga homicide section sa Cebu City Police Office nga gipangulohan ni SPO1 Ruth Violango nasayran nga samtang nahunong ang motorsiklo, kalit lang usa ka lalaki ang miduol ug misumbag ni Mendoza.

Ang drayber nga si Bacatan nga nakabantay nga dunay patrol car nga nag-una kanila ang nagsige og sirbato sa iyang motorsiklo hangtud nga kini gidunggab sa maong lalaki.

Human sa insidente daling nakasibat ang nanunggab samtang gidala sa Cebu City Medical Center (CCMC) si Bacatan. -/GMR) (BANAT NEWS)