Sakyanan sa Buhisan gigamit sa personal?

CEBU, Philippines – Wala makagamit sa sakyanan nga hinatag sa Cebu City Hall ang kapitan sa barangay Buhisan nga si Gremar Barete.

Kini human ang gitugyanan sa Innova nga sakyanan mao si Konsehal Israel Bacarisas nga giingong kaalyado ni Mayor Michael Rama.

Apan nasayran nga ang sakyanan gamiton usab ni kanhi kapitan Ramil Rago kinsa nagtrabaho na sa City Hall.

Si Rago napilde sa iyang kaatbang nga si Barete sa niaging eleksiyon.

Nanghinaut si Barete nga mahatagan og solusyon ang maong isyu ilabi na nga usa sa ilang kalisdanan ang sakyanan ug maapektohan na hinuon ang paghatag og serbisyo sa katawhan.

Si Bacarisas sa iyang bahin mihimakak nga gigamit sa personal ang sakyanan nga giisyu kaniya.

Giklaro usab sa konsehal nga kun dunay mogamit sa Innova mananghid kini kaniya ug dunay trip ticket nga ihatag.

Matud ni Barete nga dunay bulok politika ang nahitabo sa ilang lugar karon dungan sa pag-ingon nga dili gyud kini malikayan ilabi na nga sakop siya sa Bando Osmeña Pundok Kauswagan (BOPK). -/GMR) (BANAT NEWS)