Nanglungkab sa SSS nailhan na

CEBU, Philippines – Gikatakdang pasakaan og kaso sa kapolisan ang mga suspetsado sa paglungkab sa Social Security System (SSS) Mandaue City Branch human usab nila masukitsukit ang duha ka minor de edad nga lalaki ug giila ang duha ka tawo nga maoy nagdala sa laptop nga ilang kinawat.

Si SPO2 Marcos Noval, miingon nga nunot sa pagkasikop sa duha ka minor de edad, ilang nasayran nga lima ka laptops ang gitugyan sa duha ka mga bata ngadto sa duha ka tawo nga giila lang nila nga si Macmac ug Calvin.

Matud ni Noval nga ilang gitugyan sa Department of Social Welfare and Development (DSWD) ang duha ka minor de edad alang sa ilang pag-atiman.

Ang nagdala karon sa maong mga butang nga kinawat maoy pasakaan og kaso tungod kay pulos na man kini hingkod.

Si Noval miingon nga ang minor de edad nga 11- anyos nga taga Basubas Compound, Tipolo sa maong dakbayan una na nilang nadakpan kaniadto nga maoy suspek sa pagkawat sa kargadang shotgun sa usa ka guwardiya nga gidestino sa pagbantay sa usa ka establisamento sa reclamation area.

Ang gihimo nilang paglungkab sa buhatan sa SSS sa may barangay Guizo ang gikompirmar usab sa lain pang minor de edad ug ang mga butang nga ilang kinawat ilang gitugyan ngadto nilang Macmac ug Calvin ug molupyo sa maong lugar. -/GMR) (BANAT NEWS)