Dispatcher gidakop

CEBU, Philippines - Giposasan sa mga polis ang usa ka dispatcher nga ilang naaktohan nga nanawag og pasahero nga mosakay sa PUJ didto sa A. C. Cortes Avenue sa Barangay Cambaro, dakbayan sa Mandaue kaniadtong Biyernes sa gabii. Si PO1 Milven Pelayo sa kapolisan sa Presinto 5 sa Mandaue City Police Office (MCPO) miila sa nadakpan nga mao si Reynaldo Hinson, 46, minyo nga taga Barangay Pajo, dakbayan sa Lapu-Lapu.

Matud pa ni PO1 Pilayo nga naaktohan nila ni PO2 Niño Gorneo ug PO1 Michael Mata si Hinson nga nagsige’g panawag og pasahero nga mosakay sa mga mohunong nga PUJ sa maong dapit.

Kini ang hinungdan nga dali kini nilang gidakop ug ilang nakuha gikan sa dinakpan ang P70 nga pulos tag P5 nga sinsiyo nga ilang gituohan nga nakolekta gikan sa mga PUJ drayber nga masakyan usab og pasahero sa maong dapit. Ang Mandaue adunay anti-dispatching ordinance nga nagdili sa mga dispatchers pag-operate sa siyudad hinungdan nga gidakop si Hinson ug gibalhog sa ilang detention cell.

Si Edwin Ermac nga maoy operation chief sa Traffic Enforcement Agency of Mandaue  (TEAM) miingon nga ang ilang pagpanakop sa mga dispatcher sa kadalanan sa Mandaue maoy kabahin sa ilang tinguha nga pagpahapsay sa kadalanan. Gipasabot ni Ermac nga kun pasagdan lang ang mga dispatcher nga manawag og pasahero sa mga dalan sa dakbayan dako ang kahigayonan nga ang mga drayber sa PUJ madasig na hinuon pagmugna og ilegal terminal.

Si Ermac miingon nga ang pagpunay og panawag og pasahero sa dispatcher dili na hinuon molarga ang drayber kay matental man sa pagpaabot sa mosakay nga pasahero.  (BANAT NEWS)