Mga opisyal sa Mandaue nanglimpiyo

CEBU, Philippines - Nagtinabangay sa paglimpiyo sa mga kanal ug mga sapa sa dakbayan sa Mandaue ang 2,000 kapin ka tawo nga gilangkuban sa mga kawani sa City Hall, mga barangay workers ug mga opisyal sa 27 ka barangay.

Ang kalihukan kabahin sa International Clean-up Day nga gihimo sa tanang lokal nga kagamhanan sa Sugbo.

Si Mayor Jonas Cortes maoy nangulo sa mga kawani sa City Hall ug ang mga barangay kapitan usab ang nangulo sa pagpasiugda sa kalihukan sa matag barangay. Ang paglimpiyo sa sapa ug mga kanal maoy kabahin sa pagsulbad sa mga pagbaha nga masinati panahon nga kusog ang pagbunok sa uwan.

Si Director Isabelo Montejo sa Department of Environment and Natural Resources (DENR-7 miingon nga nagkadaku na gyud ang panginahanglan sa mga lokal nga kagamhanan sa pag-ugmad og mga water catchment.

Dugang pa niya nga ang water catchment magsilbing pundohanan sa tubig panahon nga kusog ang uwan ug makuhakuhaan ang tubig nga makamugna og mga pagbaha. Gisugyot usab ni Montejo sa mga panimalay ang pagbutang og mga baril nga mahimong kapundohan og tubig nga magamit usab sa pagpamubo sa mga tanum.  (BANAT NEWS)