Trabaho suspensuhon kun magbaha

CEBU, Philippines - Ang Alliance of Progressive Labor (APL) mohangyo sa Department of Labor and Employment (DOLE) 7 nga modeklarar usab og suspensyon sa trabaho sa mga pribadong mga kompanya panahon mobunok ang kusog nga ulan ilabi na kun  magbaha.

Matud pa sa pangulo sa Alliance of Progressive Labor nga si Jose Tomongha sa interbyu sa dyAB nga nakita nila ang kinahanglanon usab nga suspensuhon ang trabaho sa mga pribadong mga kompanya kung grabe ang pagbaha.

Gihimo niyang sanglitanan ang nangatanggong nga trabahante tungod sa pagbaha sa Metro Cebu niadtong adlaw’ng Huwebes.

Giawhag ni Tomongha ang DOLE nga mohimo og kasabotan tali sa mga pribadong kompanya bahin sa maong tinguha.

Si Tomongha nga usa sa mga labor representative sa Regional Tripartite Wages and Productivity Board (RTWPB) 7 nisaad nga  iyang iduso ang maong hangyo ngadto sa DOLE- 7 atol sa tigum sa Regional Tripartite Wage Productivity Board (RTWPB) 7 sa sunod semana.  (BANAT NEWS)