Labing daku nga Zumba class gitinguha
CEBU, Philippines - Gitinguha nga mabu-ak ang world record pinaagi sa pagmugna sa labing daku nga porma sa human pink ribbon ingun man ang labing daku nga zumba class nga ipahigayon karong Oktobre 18 sa SM Cebu North parking area.
Ang kalihukan kabahin sa pagsaulog sa Breast Cancer Awareness Month sunod buwan nga giulohan og “2 World Record Attempts 1 Day 1 City.”
Si Lita Quisumbing sa Cebu Zumba Instructors Network mibutyag nga ang maong dungan nga kalihukan uban sa Rotary Club of Cebu Fuente gipaabot nga salmutan sa mga partisipante gikan sa Bohol, Dumaguete, Cebu ug ubang bahin sa Central Visayas.
Sa pagkakaron ang India maoy naghupot sa world record nga dunay 6,671 ka partisipante sa ilang gihimong zumba class ug 6,847 ka tawo sa labing daku nga human pink ribbon formation.
Matud ni Meanne Solomon sa Rotary Club of Cebu nga ang pink ribbon magpahinumdum sa kababayen-an sa pagpahiling sa ilang suso batok sa cancer.
Sa mga gustong mosalmot mahimong moparehistro na daan sa Sports Zone sa SM City Cebu diin P50 lang ang registration fee alang sa mga moparehistro hangtud sa Septiyembre 30 ug P150 na sa mga moparehisto gikan sa Oktobre 1 hangtud na sa adlaw sa kalihukan. (Decemay P. Padilla/GMR)(BANAT NEWS)
- Latest
