Mga drayber, operators nangreklamo

CEBU, Philippines - Mireklamo ang mga drayber ug operator sa mga public utility jeepneys sa pagpanakop sa Land Transportation Office-7 sa ilang mga sakyanan nga kuwang o depektoso ang accessories.

Si Greg Perez, coordinator sa Pinagkakaisang Samahan ng mga Tsuper at Operator Nationwide (PISTON), miingon nga duha ka PUJ sa ilang kauban sa kahugpongan ang nadakpan.

Kini ang hinungdan sa ilang pagbisita kagahapon sa buhatan sa LTO-7 sa pagpakigtagbo sa mga opisyal tungod kay ang silot nga gipahamtang gibase man gihapon sa Joint Administrative Order 2014-01 bisan kun wala pa maresolbar ang ilang protesta labot         niini.

Dugang ni Perez nga sa ilang pagpakigtagbo sa mga opisyal sa LTO-7, ilang nasayran nga wala makadawat og kamandoan ang maong buhatan gikan sa kaulohan nga nagsuspenso sa  pagpatuman sa JAO 2014-01.

Gitataw ni Perez nga ubos sa JAO 2014-10  nga ang ilang PUJ nga madakpan sa kalapasan sa depektoso nga accessories dad-on kini sa impounding area ug dili na tugotan sa pagpamasahero hangtud nga mabayran ang multa nga P5,000 ug makompleto na ang accessories niini.

Matud ni Perez nga gumikan sa maong kahimtang sila nga transport group sa Sugbo naghimo karon og mga plano sa pagpasiugda og hiniusang kalihukan alang sa pagpadayon sa ilang protesta batok sa JAO 2014-01 nga gipatuman sa LTO. (BANAT NEWS)