Sobrang saba idili sa Talisay

CEBU, Philippines - Mamahimo na unya’ng krimen sa dakbayan sa Talisay ang sobra’ng kasaba kun hingpit nga maaprobahan ang ordinansahon nga maghatag og silot sa mga magsaba-saba sa gitakdang mga oras.

Ang ordinansahon nga giduso ni Konsehal Aldin Diaz magsilot niadtong mga sakyanan nga kusog kaayo og busina nga wala kinahanglana ug pagsyagit-syagit sa kadalanan gikan alas 11 sa gabii hangtud alas 7 sa buntag.

Apil usab sa masilutan ang mga nagbuhi og kahayopan nga sabaan kaayo nga makadisturbo sa ubang tawo ug uban pa’ng matang sa pagsaba-saba nga makabalda sa kahilom ug sa pagpahuway sa mga tawo sa palibot.

Hatagan og konsiderasyon ang mga ambulansiya, police car, firetruck ug uban pa’ng mga sakyanan nga naay emergency apil na ang mga proyekto sa kagamhanan nga magmugna og kasaba.

Ang madakpan sa una ug ikaduhang higayon makabayad sa tukmang multa apan sa ikatulo kompiskahon na ang rehistro sa sakyanan. (BANAT NEWS)