Mga adik nga kawani sa Naga suspensuhon
CEBU, Philippines - Si Naga City Mayor Valdemar Chiong mibutyag nga suspensuhon g’yud sulod sa unom ka buwan ang mga kawani sa city hall nga positibo sa paggamit og ilegal nga drugas atol sa gipahigayong drug test sa milabay’ng adlaw.
Una niini, ang Cebu Provincial Anti Drug Abuse Council (CPADAC) mipahigayon og drug test sa 73 ka mga kawani sa city hall ug kasagaran kanila mga driver.
Napulo ang nagpositibo samtang dunay tulo nga matud pa misibat dihang nasayod nga ipaubos sila sa drug test. Si Chiong miingon nga samtang wala pa ang resulta sa confirmatory test makapadayon pa sila sa ilang trabaho.
Kun mahuman na ang ilang suspensiyon mahimo pa silang makabalik apan kinahanglan nga pamatud-an nila nga dili na sila mogamit og ilegal nga drugas.
Samtang gimanduan na ni Chiong ang iyang Human Resource Department nga ang tulo nga misibat paesplikaron kun nganong misibat atol sa drug test. (BANAT NEWS)
- Latest
