Suspek sa Avon rob

CEBU, Philippines – Gipresentar sa hepe sa Cebu Provincial Police Office ang usa ka suspek sa pagpatay sa guwardiya sa Avon Products and Cosmetics sa Tabunok, Talisay City niadtong Septiyembre 11 ning tuiga human kini nasikop sa Talisay City Police Station niadtong nakalabay nga adlaw sa Sitio Kilawan, Cansojong sa mao gihapong siyudad.

Si Sisinio Merced, 55, nagpuyo sa maong lugar ang gisikop human nga nakadawat og impormasyon ang kapulisan sa kalambigitan niini sa nahitabong palpak nga tulis ug sa pagpatay sa guwardiya sa maong establisemento nga si Ramel Bono. Sumala pa ni Superintendent Reycel Carmelo Dayon ang hepe sa Talisay City Police nga nasurpresa siya dihang iyang nahibaw-an nga taga Talisay ra ang suspek sa krimen, apan dali nilang gipanid-an ang lihok niini ug gikuhaan og hulagway.

Matud pa ni Dayon nga gipakita nila ang hulagway ngadto sa cashier sa maong establisamento ug giingong positibo kini nga gitudlo nga usa sa mga tulisan. Matud pa nga pagkakita ni Merced nga misukol si Buno, misud kini ug maoy mipusil niini. Si Buno giingong unang gipakuryentihan sa usa nianang tungora gamit ang usa ka stun gun apan misukol.

Atubangan sa suspek, sa mga opisyal sa kapulisan ug sa mga tigbalita gipakita sa Talisay police ang video nga nakuha gikan sa Avon nga duna’y kuha sa usa ka lalaki nga nagbarog sa gawas nga nagkalo ug gitumbok nga si Merced, apan hugtanon kini nga gihimakak sa naulahi.

Si Senior Superintendent Noel Gillamac mipasalamat sa kapulisan sa Talisay nga dali nga nakasikop kang Merced ug mimando nga pangitaon ang kauban niini. Si Mayor Johnny Delos Reyes nalipay sa maong kalamboan samtang si Konsehal Danny Caballero, chairman sa Committee on Peace and Order nanawagan sa kapulisan nga sikupon ang kauban ni Merced.

Matud sa mayor nga tungod niini, madasig ang mga magpapatigayon pagbubo pa og puhonan sa siyudad.

Samtang giawhag sa konseho si Delos Reyes nga ipatuman ang duha ka tuig nga ordinansa nga nagmando sa mga establisamento nga magmuntar og CCTV cameras. Apan adunay mas epektibong paagi ang mayor aron ma-maximize ang gamit sa CCTV, buot niyang idugang sa ordinansa nga kinahanglang patan-awon sa camera ang mga manulod nga kustomer.

Nahuna-hunaan sa mayor nga mahimo niyang sundon ang gihimo ni Mayor Michael Rama sa Cebu City nga kadtong mga establisemento pasirad-an kung way CCTV ug security guards. -/EIM) (BANAT NEWS)