Mga tanod sa siyudad nanglimpyo

CEBU, Philippines – Nanglimpyo sa mga coastal areas ang mga tanod sa nagkalain-laing barangay sa dakbayan sa Sugbo inabagan sa Coastal Management Board (CMB).

Tumong sa maong kalihukan aron paglimpyo sa mga basura nga usa sa hinungdan kon nganong daling bahaon ang siyudad sa Sugbo.

Ang mga tanod ug CMB nanglimpyo sa Tejero creek ug sa bukana sa Guadalupe River.

Si Sammy Dasok, coordinator sa mga tanod, mibutyag nga ilang gihangyo ang mga tanod sa nagkalain-laing barangay sa pagtabang sa paglimpyo tungod kay ilang nakita nga pwerte na kahugaw sa kasapaan.

Lakip sa gisusi ang mga illegal structures nga nakabara na hinuon sa kasapaan ug nasulod na sa three-meter easement.

Si Helen Milana kinsa dunay kan-anan dapit sa sapa miingon nga kon gub-on gyud ang iyang pwesto, wala siya’y mahimo kon di ang pagtuman sa balaud.

Samtang matud sa CMB executive director Virgilio Mirafuentes Jr. nga dugay na nga problema ang basura sa siyudad ug gani si Mayor Michael Rama na ang nagmando kanila nga sulbaron kini.

Gitataw ni Mirafuentes nga kinahanglan gyud ang tabang sa tanan aron masulbad ang maong problema. -/GMR) (BANAT NEWS)