Bagyong Luis gi-monitor

CEBU, Philippines – Ang Visayas makasinati og pag-uwan-uwan tungod sa bagyong Luis ug nagpakusog usab niini ang hanging habagat matud ni Luciano Villamor sa Philippine Atmospheric Geophysical and Astronomical Services Administration sa Mactan.

Si Luis mag-landfall kagahapon sa hapon o sa gabii sa Cagayan-Isabela nga may hangin nga 130 kph (kilometer per hour) duol sa sentro ug muabot sa 160 kph ang gikusgon sa unos.

Si Luis nag-irog sa kasadpan amihanang kasadpan sa gikusgon nga 22 kph. Karong adlawa si Luis gibana-banang mahimutang sa 288 km (kilometer) sa kasadpang bahin sa Laoag City.

Ug sa Martes sa hapon mahimutang kini sa 860 km sa kasadpan amihanang kasadpan sa Laoag City o gawas na sa Philippine Area of Responsibility (PAR). Dugang niini ang ubang parte sa Luzon ug kasadpang Visayas makasinati og uwan nga dala sa habagat inubanan sa kasarangan ngadto sa kusog nga huros sa hangin sa habagatang kasadpan. Gitataw ni Villamor nga mga pag-uwan lang ang masinati sa Visayas tungod sa bagyong Luis. Ang Pagasa mipahimangno nga kadtong mga gagmay’ng panagatan ug barko nga dili sa maglawig sa kasadpang bahin sa Central Luzon , Southern Luzon ug Visayas. -/EIM) (BANAT NEWS)