P270 mil natigum sa Alay Lakad sa Toledo
CEBU, Philippines – Nagmalampuson ang gipahigayun nga Alay Lakad 2014 Walk for a Cause sa dakbayan sa Toledo kagahapong adlawa.
Nisalmot sa tinuig nga kalihukan ang mga grupo gikan sa pribadong sektor, non-government organization (NGO), mga estudyante sa nagkadaiyang tunghaan sa siyudad ug mga empleyado sa gobiyerno.
Matud sa Alay Lakad Foundation organizers nga mas doble ang ihap sa mga nitambong karong tuiga itandi sa nakalabay’ng tuig.
Nasayran nga nakatigum ang Alay Lakad Foundation Toledo City og P270 mil gikan sa mga nisalmot.
Ang maong pondo gamiton sa pagpatungha sa mga out-of-school youth sa dakbayan pinaagi sa skills training aron makabaton og maayo nga trabaho.
Matud ni kanhi konsehal, Amuerfino Amiboy Perales, chairman sa Alay Lakad Foundation, nga mapasalamaton siya sa tanang nitambong.
Siya malaumon nga mapadayon pa ang maong kalihukan aron mas daghan pa nga out-of-school youth sa dakbayan ang matabangan. -/GMR) (BANAT NEWS)
- Latest
