Road separator gisugdan pagbutang

CEBU, Philippines -  Ang Cebu City Traffic Operations Management anam-anam na nga mibutang og sementado nga “road separator” sa Gorordo Avenue atubangan sa simbahan sa mga Mormons aron dili makahimo og “U-Turn” ang mga sakyanan.

Daghang mga sakyanan nga panahon sa buntag ug hapon nga gidili ang pag-left turn paingon sa JY Square niadtong mga sakyanan nga gikan sa Sitio Sudlon, anha ra moliko sa tungod nga bahin sa simbahan sa Mormons. Ang Gorordo Avenue adunay “yellow solid line” taliwala sa karsada nga nagpasabot nga wala itugot ang paghimo og U-turn apan ang mga sakop sa CITOM dili estrikto nga manakop sa mga malapason.

Ang mga motorista nga gikan sa Sitio Sudlon dapit sa Beverly Hills mireklamo usab kay samtang gidili ang pag-left turn paingon sa JY Square panahon sa busy kaayo nga oras sa buntag ug hapon, apan ang CITOM napakyas pagbutang og “U-turn slot” nga adto makaliko ang mga sakyanan aron makapaingon sila sa JY Square.

Samtang ang pagbutang og sementado nga road separator sa mao nga dapit makapugong sa mga motorista nga dili na maka-U-turn apan gipanglantawan nga makapasamot kini sa kahuot sa sakyanan sa mao nga dapit.

Gitan-aw usab nga nahimo’ng “choke point” ang Gorordo Avenue tungod g’yud sa eskena sa karsada gikan sa Sudlon kay ang mga sakyanan dili makapaspas sa pag-agi tungod sa daghang mga motorsiklo nga gigamit isip “habal-habal” nga anaa ra gipangparada daplin sa karsada.

Ang mga drayber nga sagad mag-agian sa mao nga dapit mireklamo usab tungod sa mga sakyanan nga gipanag-iya sa mga balay-patigayon nga anha iparada sa daplin nga makapasamot sa traffic. (RUB) (BANAT NEWS)