Mga priso iparehestro aron makabotar
CEBU, Philippines - Gitinguha ni Mandaue City jail warden Gil Inopia nga marehestro usab ang mga binilanggo sa gidumala niya nga bilanggoan aron sila makabotar sa eleksyon unya 2016.
Si Chief Inspector Inopia miingon nga dili pa hinuon karon ang tukmang panahon sa pagparehistro sa maong mga binilanggo sa gidumala niya nga prisohan kay layo pa man ang eleksyon.
Gitataw ni Inopia nga dili pa masiguro kon sa pag-abot sa maong tuig nga mao na ang pagpahigayon sa piniliay kon anaa pa ba gihapon sila sa maong bilanggoan kay mag-agad man kini sa mga kaso nga ilang giatubang.
Adunay 1,042 ka binilanggo ang anaa sa Mandaue City Jail ug kadaghanan kanila nadakpan sa kapolisan sa paglapas sa balaod sa drugas.
Si Atty. Anna Fleur Gujilde nga maoy election officer sa Mandaue miingon nga matag Domingo ilang gipahigayon ang satellite registration sa nagkalainlaing barangay nga ilang gibase sa pag-awhag sa mga barangay kapitan.
Matud ni Gujilde nga lakip sa ilang irehestro mao ang Persons with Disability (PWD) ug Senior Citizen. (BANAT NEWS)
- Latest
