Polis nga motestigos hatagan og allowance

CEBU, Philippines -  Ang Cebu City Anti-Drug Abuse Council misugyot nga hatagan og allowance ang mga polis nga motestigos didto sa piskaliya ug sa hukmanan sa mga kaso nga may kalabotan ang drugas.

Ang mga sakop sa CADAC mipasar og resolusyon nga nag-awhag sa konseho sa dakbayan nga gahinan og salapi ang proyekto nga ilang gilantaw nga makapadasig sa mga polis nga motestigo g’yud sa mga kaso kabahin sa drugas.

Si Atty. Clarence Paul Oaminal nga kanhi Undersecretary sa Dangerous Drugs Board (DDB) ug karon consultant ni Mayor Michael Rama ug naglingkod nga presiding officer sa CADAC, maoy misugyot niini’ng mao nga lakang.

Matud ni Oaminal nga gamay ra kaayo ang gisugyot niya nga P300 nga allowance nga ihatag sa mga polis sa matag higayon nga sila motestigos sa mga kaso nga may kalabutan ang drugas.

Nasuta ni Oaminal nga daghan kaayo nga mga kaso nga na-dismiss lang sa piskaliya ug sa hukmanan kay ang mga polis wala makatunga atol sa hearing. Daghan usab nga mga polis ang gi-dismiss tungod sa kapakyas nila pagtuman sa ilang court duty. Nahibaw-an ni Oaminal nga daghang polis nga nihit kaayo og kuwarta nga magamit isip pamasahe pag-adto nila sa piskaliya ug sa hukmanan.

Si Oaminal miingon nga ang mga opisyal sa kagamhanan dili kaayo makahuna-huna niini kay aduna man sila’y mga sakyanan nga giisyu kanila, apil na ang gasolina, apan ang mga polis sila mismo ang mokuot sa ilang bulsa alang sa pamasahe.

Naglaum si Oaminal nga suportahan sa mga konsehal ang sugyot sa CADAC nga magpagahin og salapi alang sa mao nga katuyoan.  (BANAT NEWS)