Masusong natagak di tinuod — VSMMC
CEBU, Philippines - Gihimakak sa kadagkuan sa Vicente Sotto Memorial Medical Center nga dunay nahitabong pagkatagak sa usa ka masuso human kini matawo sulod sa ospital.
Matud sa pamahayag nga gipirmahan ni medical center chief Doctor Gerardo Aquino, Jr., ilang nahibaw-an nga inay sa delivery room, didto sa labor room nakaanak ang inahan nga giingong natagak tungod sa paspas nga pagbati niini.
Bisan pa man sa nahitabo, daling giatiman sa nurse supervisor ang masuso, dugang sa pamahayag.
"She (nurse supervisor) categorically denies the statement that the baby fell on the floor. The Nurse Supervisor's statement is corroborated by signed statements of a Medical Intern present at that time and a patient in labor room bed #3. Three additional patients also affixed their signatures as witnesses," napatik sa opisyal nga pamahayag. Dugang sa ospital, gihiling matud pa ang bata sa pediatric resident, pediatric medical specialist, ingon man pediatric intensive care specialist, human sila mabalhin sa inahan niini ngadto sa obstetrics ward. Way injury nga nahitabo sa masuso ug sa inahan.
Si VSMMC media liaison officer Nonoy Mongaya nagkanayon nga opisyal nilang nadawat ang reklamo sa amahan sa bata Huwebes alas 12:50 sa hapon apan human na kini nagpa-interbyu sa media ug mireklamo sa Department of Health 7.
Gisuwayan pagkuha sa Banat News ang habig sa ginikanan sa bata apan mibalibad kini ug miingon nga ayha ra sila pa interview kung makagawas na ang inahan ug bata sa ospital. (BANAT NEWS)
- Latest
