Cebu City CTO naghigpit sa seguridad
CEBU, Philippines - Agi og paniguro, ang City Treasurer’s Office sa Cebu City Hall gibutangan og upat ka polis duha niini nakauniporme ug ang laing duha wala makauniporme sukad niadtong milabay’ng adlaw nga Miyerkules.
Kini maoy gihimong panagana nunot sa sunod-sunod nga insidente sa pagpanglungkab sa treasurer’s office sa ubang kalungsoran ug dakbayan.
Ang hepe sa CTO nga si Diwa Cuevas nagkanayon nga ang maong lakang nahuna-hunaan sa Cebu City Police Office (CCPO).
Matud ni Cuevas nga gawas sa mga polis dunay Civil Security Unit (CSU) nga magbantay sa city hall sukad pa kaniadto.
Ang CSU mosuroy sa tanang buhatan diha sa city hall human sa office hours pagsusi kung na-lock ba ang pultahan sa mga buhatan ug walay mga nabilin sa sulod.
Gawas sa mga polis ug CSU ang city hall duna say mga Close Circuit Television (CCTV) camera.
Si Senior Superintendent Noli Romana, hepe sa Cebu City Police Office kinsa misusi sa security measures sa Cebu City Hall miingon nga duna pay angayang i-improve sa seguridad.
Dugang ni Romana nga kinahanglan pang palig-onon ang kaalerto sa mga guwardiya nga nagbantay ilabi na kadtong nadestino sa pagbantay atol sa weekend. (BANAT NEWS)
- Latest
