Porno films accessible sa kabataan–POPCOM

CEBU, Philippines - Gibutyag sa Population Commission (POPCOM) 7 nga midaghan ang mga batan-ong babaye sa Central Visayas nga motan-aw og pornographic movies tungod sa internet.

Sigon pa ni POPCOM - 7 Planning Officer Myrna Alaba nga  sa ilang nahipos nga data may 36.9 % sa mga batan-ong babaye nga motan-aw og pornographic materials sa tuig 2002 ug nisaka kini ngadto sa 47.5% sa tuig 2013.

Samtang niminus ang gidaghanon sa mga batan-ong mga lalaki nga  manan-aw niini gikan sa 78.4% sa tuig 2002 nahimo na lang kini karong 76% sa tuig 2013.

Si Alaba nagkanayon usab nga duha sa napulo ka mga batan-on sa Central Visayas mopadala ug makadawat og mga sex videos pinaagi sa cell phones o sa internet.

Ang Central Visayas maoy matud pa ikatulo nga rehiyon sa nasud nga may taas nga porsiyento sa mga batan-on nga mitan-aw og x-rated movies/videos gikan sa internet nga 62.4% base sa Young Adult Fertility and Sexuality Study (YAFS4).

Nag-una ang CARAGA region nga may 66.7% ug ikaduha ang National Capital Region (NCR) nga may 66.2%.

Samtang si POPCOM-7 Information Officer Darlyn Remolino mitug-an nga sa 1,425,883 ka mga batan-on sa Central Visayas sa 2013, kapin sa 503,000 niini ang nalambigit sa premarital sex  ug 353,000 kanila ang wala mogamit og bisan unsang matang sa  proteksyon atol sa unang pakighilawas.

Samtang sa 376,411 ka mga batan-ong babaye nga nagpangidaron og 15 hangtud 19 anyos, kapin sa 49,000 kanila ang duna nay anak.

Nasayran usab nga kulang sa kasayuran kabahin sa HIV-AIDS ang mga batan-on hinungdan nga gihingusgan karon sa POPCOM-7 ang information dissemination kalabot sa teenage sexuality and reproductive health lakip na ang tukmang giya gikan sa mga ginikanan hangtud na sa mga magtutudlo sa mga kabatan-onan. (BANAT NEWS)