Traysikol drayber nangayo’g terminal

CEBU, Philippines – Ang mga drayber og traysikol nga nagbiyahe sa Barangay Centro, dakbayan sa Mandaue mihangyo karon nga kahatagan unta sila og lugar nga mahimo nila nga terminal aron adto na motultol ang mga pasahero nga mosakay kanila.

Gipadangat nila ang hangyo atol sa public hearing nga gisalmotan sa mga drayber nga sakop sa Pinagkakaisang Samahan ng mga Tsuper at Operator Nationwide (PISTON) nga gipangulohan ni Greg Perez. Matud sa mga drayber og traysikol nga tungod kay wala’y terminal ang mga traysikol bisan asa na lang sila mohunong aron magpaabot og mga pasahero ug musangpot na hinuon nga sila madakpan.

Ang operation chief sa Traffic Enforcement Agency Mandaue (TEAM) nga si Edwin Ermac sa iyang bahin mipahibalo nga pagka karon maoy iyang gitan-aw nga ang dakong lugar sa karaang merkado mahimong termporaryo nga terminal sa mga traysikol.

Gitataw ni Ermac nga ang maong plano nagkinahanglan hinuon og pag-uyon sa tagdumala sa kamerkadohan tungod kay makahatag man usab kini og epekto sa mga naninda sa merkado publiko sa Sitio Tribunal, Barangay Centro.

Matud ni Ermac nga moreklamo ang mga naninda sa merkado publiko sa Sitio Tribunal kay kon butangan og terminal ang mga traysikol sa karaang merkado publiko dili na man mulahos ang mga pumapalit niini ngadto kanila. (BANAT NEWS)