Mga piniriso sa Lapu- Lapu nag-sinulog
CEBU, Philippines – Nihalad og sayaw sa Sinulog ang mga piniriso sa Lapu-Lapu City Jail isip pagsaulog sa adlaw sa Birheng Maria niadtong Lunes.
Si Supt. Reynante Rubio, jail warden, nagkanayon nga mao kadto ang unang higayon nga nakapresentar sila og Sinulog-themed jail fiesta.
Sa mga niaging piyesta sulod sa City Jail, ang variety show sama sa pagkanta, pagsayaw ug mga parlor games lang ang namugna sa mga piniriso.
Gawas sa mga livelihood ug skills training program nga gipangtudlo sulod sa City Jail, si Rubio miingon nga pinaagi sa gihisgutang sayaw, mamahimong mapalambo ang creative side sa mga piniriso ug mosilbi kini isip tool therapy kanila.
Matud ni Rubio nga dili unta madayon ang sayaw tungod sa kusog nga bunok sa uwan apan nihangyo ang mga inmates nga ipadayon.
Si Rubio miingon nga kapin sa 700 ka tawo ang gibana-bana nga nibisita sa mga piniriso.
Usa sa mga nitambong mao si Mayor Paz Radaza nga mipakita og suporta sa pista sulod sa City Jail.
Kapin sa usa ka libo ang mga lalaki ug 130 ka babaye sulod sa mao nga prisohan.
Dugang ni Rubio nga plano nilang mohimo og laing kalihukan aron mawala ang idleness matag piniriso ug mas aktibo ang ilang lifestyle sulod sa prisohan. -/GMR) (BANAT NEWS)
- Latest
