Amahan, anak nakig-pinusilay sa kapolisan

CEBU, Philippines – Nasikop sa kapolisan sa lungsod sa Pinamungajan ang amahan ug anak human sa ginukdanay samtang nakigpinusilay nga milanat og usa ka oras ala-1:00 sa miaging hapon.

Ang nasikop naila nga sila si Fernando Gabuya, 44, ug Reeve Ceazar Gabuya, 23,  taga Looc, Bato, dakbayan sa Toledo.

Si PO1 Henry Ferras, desk officer sa Pinamungajan Police Station, nga nahinabi sa Banat News miingon nga ang amahan ug anak nga kadudahan ang lihok mi-check-in sa usa ka lodge sa barangay Tajao.

Apan gikataho nga gisulod sa mga suspetsado ang motorsiklo nila ngadto sa kwarto nga ilang gi-abangan hinungdan nga na-alarma ang mga kawani sa maong lodge ug nanawag og kapolisan.

Matud ni Ferras nga sa pag-abot sa kapolisan padulong na mogawas ang amahan ug anak luwan sa ilang motorsiklo ug dihang gipara sa kapolisan nipabulhot ang amahan og dagan.

Milanat og usa ka oras ang ginukdanay sa kapolisan ug sa mga suspek apan na-corner sila sa barangay Tanibag, bukirang barangay sa Pinamungajan dihang napagngan sila og makina.

Matud pa ni Ferras nga mibunot sa iyang armas ang amahan hinungdan nga gipusil kini ni PO2 Bendie Nuñez nga angkas ni PO2 Alcris Labrador nga migukod sa mga suspek.

Daling gidala sa tambalanan ang amahan tungod kay nakaangkon kini og samad sa iyang wala nga kamot.

Narekober sa kapolisan gikan ni Fernando ang usa ka .45 kalibre nga pistola, duha ka magazine nga may 20 ka bala, 16 ka medium-sized nga pakete sa gituohang shabu ug salapi nga P500.

Samtang si Reeve Ceazar nakuhaan og ubay-ubay nga drug paraphernalia.

Pasakaan og kasong paghupot og armas, paghupot og illegal nga drugas ug drug paraphernalia si Fernando samtang ang anak niya pasakaan og kasong paghupot og drug paraphernalia. -/GMR) (BANAT NEWS)