Dengue sa Balamban gisusi
CEBU, Philippines – Human migawas ang report nga dunay duha ka bata sa lungsod sa Balamban ang namatay sa sakit nga dengue, ang Regional Epidemiology and Surveillance Unit (RESU)-7 dali nga misusi sa lugar.
Ang duha ka bata nga namatay pulos nagpangedaron og 7-anyos nga residente sa barangay Aliwanay ug Pondol sa maong lungsod.
Si Dr. Dino Caing sa RESU-7 mibutyag nga ilang susihon kon diin nakuha sa mga namatay nga bata ang sakit nga dengue aron mopahigayon og pamaagi aron makontrolar ang pagkatap sa sakit. Gawas sa duha ka bata nga namatay, si Caing midugang nga dunay ubang pasyente ang nalandig sa tambalanan.
Hinuon dili pa sila kasulti kon dengue ba ang ilang sakit tungod kay ipaubos pa kini sa laboratory test alang sa kompirmasyon.
Subling giawhag sa Department of Health ang publiko nga kinahanglan manglimpyo kanunay sa tugkaran, dunay proteksyon batok sa lamok ug kon magpundo og tubig kinahanglan siguraduhon nga dili kini itlogan sa lamok.
Hinoon, sa record sa RESU-7 nagkagamay ang tawo nga nataptan sa dengue gikan sa buwan sa Enero hangtud sa Agosto karong tuiga itandi sa samang mga buwan sa miaging tuig. -/GMR) (BANAT NEWS)
- Latest
