Wa’y helmet nasakpan nga may shabu
CEBU, Philippines – Gidakop sa kapolisan ang usa ka tawo nga nasigpatan nga misalibay unta sa gidalang shabu ug drug paraphernalia sa dalan H. Abellana sa Canduman, dakbayan sa Mandaue alas 11 ang takna niadtong Sabado sa gabii.
Si SPO1 Silveriano Aparicio sa Presinto 6 sa Mandaue City Police Office (MCPO) miila sa nadakpan nga si Euler Rivera Tamayo, 19, taga Tabok sa maong dakbayan.
Laing nadakpan mao si Cresente Seballos Quintenata, 28, nga taga Purok 6, Cubacub, dakbayan sa Mandaue.
Matud ni Aparicio nga nagpatrolya ang ilang kaubang kapolisan dihang ilang nasigpatan ang motorsiklo nga gidala ni Tamayo ug angkas niini si Quintenata nga wala magsul-ob og helmet.
Dugang ni Aparicio nga gipahunong sa kapolisan ang motorsiklo sa pagbadlong unta sa angkas nga wala magsul-ob og helmet apan si Quintenata nga nagkuot sa bulsa dali niining milabay sa duha ka paketeng shabu ug tinfoil maoy hinungdan nga ilang gidakop. - /GMR) (BANAT NEWS)
- Latest
