Liboan mikuyog sa Walk with Mary
CEBU, Philippines – “Life of faith is a walk in which you have a starting point and a culmination point.” Mao kini ang paghulagway ni Cebu Archbishop Jose Palma sa gipahigayong “Walk for Mary” nga gikuyogan sa 5,000 ka mga Marian Devotees nga naggikan sa Cebu Provincial Capitol paingon na ngadto sa Archbishop’s Palace kagahapon sa kaadlawon.
Kini gipasiugdahan sa Association of the Children of Mary Immaculate – Vincentian Marian Youth (CoM-VMY), Archdiocesan Council of Cebu alang sa tanang Marian Devotees nunot sa kasumaran sa adlaw’ng natawhan sa Birheng Maria. Si Palma nagpahinumdom sa tanang mitambong sa misa nga ang kinabuhi nagsugod sa Ginoo kay kini sagrado ug matapos usab kini Kaniya.
Siya midugang nga tagsa-tagsa kanato kinahanglan usab makiglakaw sa usa’g-usa kay kita mao ang magbalantay sa atong kaigsuonan.
Ang prosisyon nagsugod alas 4:30 sa buntag ug misunod dayon ang Santos nga Misa alas 6:00 sa buntag. Dala sa mga deboto ang kandila, mga imahe ni Blessed Virgin Mary ug sa Sto. Niño samtang nagrosaryo ug nagkanta’g mga balaanong awit.
Usa ka 46-anyos nga inahan nga taga M.J. Cuenco Ave., dakbayan sa Sugbo mibutyag nga iyang gipangaliya ngadto sa Birheng Maria mao nga dili mabungkag ang ilang pagpuyo sa iyang pamilya human ang iyang bana gikatahong adunay laing gikabuangan.
“Unta hikapon sa Mahal nga Birhen iyang kasing-kasing nga sa iyang pagpanglangyaw apil ko sa nitabang niya unya karon mura na lang siya og wala kaila nako nga iya ‘kong asawa,” matud niya.
Ang mga deboto nagdala usab og mga bundles of joy ug cash isip halad ngadto sa Mahal nga Birhen nga itabang usab sa CoM ngadto sa mga nanginahanglan. - /EIM) (BANAT NEWS)
- Latest
