Bag-ong plate numbers gi-release na g’yud
CEBU, Philippines - Gipaabot nga pipila ka adlaw gikan karon panagsa na lang g’yud ang mga sakyanan nga magdagan-dagan nga walay mga plate numbers. Si LTO-7 Regional Director Arnel Tancinco mipahibalo nga gisugdan na nila sa pagpang-apud-apod ang 26 mil ka bag-ong plaka alang sa mga motor ug 12 mil ka plate numbers sa mga four-wheel nga sakyanan.
Matud ni Tancinco nga hayan estriktohon na nila pagpatuman ang “No Plate, No Travel” policy kon mahuman na nila pagpang-apud-apod ang mga plate numbers.
May uban hinuon nga mga motorista nga nakapanglantaw nga dili matuman ni Tancinco ang iyang plano kay ang LTO aduna lay pipila ka sakop nga gitugotan nga manakop sa mga badlongong drayber.
Adunay uban nga mga motorista nga dili ganahan nga makita ang ilang mga plate numbers. Kon dili nila taptapan og itum nga bildo, ang plaka sa motor adto tagoi sa ilawom sa ligid ug sa kilid sa motor.
Wala pay gi-deputize ang LTO pagka karon, bisan mga polis wala pa hatagi og mga Temporary Operators Permit (TOP). (BANAT NEWS)
- Latest
