Karsada sa Socorro ipa-“one way”

CEBU, Philippines - Gipasalig ni CITOM Executive Officer Rafael Christopher Yap nga tun-an niya kon maayo ba nga himuon nga “one way” ang karsada gikan sa Gorordo Avenue paingon sa Perpetual Soccour Hospital.

 Si Lydia Tumulak nga molupyo sa Barangay Kamputhaw mipadala og suwat ni Vice Mayor Edgardo Labella nga ipadeklarar nga “one way” ang mao nga karsada aron dili kaayo samok ang mga sakyanan ug peligro sa mga bata.

Ang karsada nga gitawag karon og Socorro Road usa ka gamay kaayo nga lisud masugat-sugatan sa mga sakyanan apan kay walay laing karsada nga magamit ang mga motorista mapugos sa pag-aginod kon may kasugat.

Ang ospital adunay karsada nga magamit nila nga exit gikan sa ilang parking area apan sagad sa mga pasyente, mga doktor ug mga ambulansya anha gayud moagi sa karsada nga gikan sa Gorordo Avenue.

Si Tumulak miingon nga naglaom siya nga unta kahatagan og pagtagad ang iyang hangyo ug sa ubang molupyo.  (BANAT NEWS)