Dugang 9 ka kawani adik!
CEBU, Philippines – Siyam na usab ka kawani sa duha ka barangay dinhi sa dakbayan ang namatud-an nga adik sa gidili nga drugas human sila mapositibo sa drug test nga gihimo gahapong adlawa Biyernes. Si Dr. Alice Utlang, hepe sa Cebu City Office for Substance-Abuse Prevention (COSAP), miingon nga 83 ka kawani sa Barangay Quiot ang gihimoan nila’g drug test ug napositibo ang usa ka street cleaner ug garbage loader. Sa Barangay Kalunasan gi-drug test usab sa mga sakop sa COSAP ang 120 ka kawani ug pito kanila ang napositibo sa paggamit og gidili nga drugas nga shabu.
Wala pa hinuon makakuha og detalye si Utlang kon unsay trabaho sa pito ka adik nga mga kawani sa Barangay Kalunasan, apan sigurado nga wala’y bisan usa kanila nga opisyal sa barangay.
Pagka karon miabot na og 190 ka kawani sa kabarangayan dinhi sa dakbayan sa Sugbo ang namatud-an nga mga tiggamitan sa gidili nga drugas. Kapin pa sa 20 ka barangay dinhi sa dakbayan ang wala pa kahimoi og drug test ang mga kawani. (BANAT NEWS)
- Latest
