Business permit sa LBC planong suspensuhon

CEBU, Philippines – Ang kagamhanan sa dakbayan sa Sugbo nagplano sa temporaryong pagsuspenso sa permit sa LBC kini nunot sa sunod-sunod nga tulis sa mga branches sa maong cargo carrier ug money transfer.

Si Mayor Michael Rama mibutyag kagahapon sa mga tigbalita nga makigtagbo siya sa city legal counsel aron matabangan siya sa iyang plano kabahin niini tungod sa sunod-sunod nga insidente sa tulis sa mga sangang buhatan sa maong establisamento.

Buot sa mayor nga ang LBC magbutang kini og mga security measures sa tanan nilang sangang buhatan.

Dili mosugot si Rama nga mabantog ug daw libreng na-advertise ang LBC tungod sa mga insidente sa pagpanulis kay pirme kining mapatik sa mga balita.

Sumala pa sa mayor di siya mosugot nga maguba ang imahe sa siyudad tungod niini nga mga hitabo. Kahinumduman nga nagsunod-sunod nga gitulis ang mga LBC branches sa Sugbo hinungdan nga giawhag kini sa kapolisan nga magbutang og gwardiya og closed-circuit television camera(CCTV).

Apan wala kini tumana sa LBC hinungdan nga nagsunod-sunod ang pagtulis kanila ug maoy gikasagmuyo sa mga lokal nga opisyal kay naguba ang imahen sa siyudad.

Sayo sa milabay’ng tuig ang konseho sa dakbayan sa Sugbo miaproba sa ordinansa nga gipaluyohan ni Konsehal Sisinio Andales sa pagbutang og mga Close Circuit Television (CCTV) camera sa mga establisamento sa siyudad.

Ang maong ordinansa nag-cover sa tanang mga balay patigayon sa siyudad nga mokita og dili momenus P5 milyones matag tuig. Tumong sa maong ordinansa ang daling pagsulbad sa mahitabong krimen.

Ang business permit and licensing section sa Cebu City Treasurer’s Office ang maoy gisangonan sa pagpatuman sa ordinansa.  - /EIM (BANAT NEWS)