Kasalan ng Bayan gipahigayun
CEBU, Philippines - Gipahigayun ang Kasalan ng Bayan sa Archdiocesan Shrine of San Roque sa Mambaling, dakbayan sa Sugbo diin 16 ka parisan ang nakapahimulos niadtong Sabado sa hapon.
Ang 16 ka parisan mga molupyo sa maong lugar nga sakop sa Archdiocesan Shrine of San Roque sa Mambaling nga gisaulog ni Fr. Elson Singson, OFM.
Ang labing bata nga parisan nga nakasal nag-edad og 22-anyos ug 55-anyos ang kinaguwangan nga nagpakasal ug sagad kanila nagpuyo-puyo na sulod sa dili momenos upat ka tuig.
Matud sa padre kura sa Archdiocesan Shrine of San Roque, Rev. Fr. Miguelito "Pads Do" Sarmago, nga gihimo nila ang kalihukan matag tuig agi og pangandam sa ilang kapistahan karong Agosto 31.
Tumong niini nga malikayan ang pagpuyo-puyo nga wala’y bendisyon sa simbahan.
Ang kura nipadayag nga maoy damgo niya sa iyang parokya nga maminusan o mawala sa hingpit ang mga Katoliko nga nagpuyo-puyo ug wala’y kasal aron adunay bendisyon o gasa ang ilang pagpuyo gikan sa Simbahan.
Ang mga madre sa Missionaries of Charity miabag sa kalihukan ug sila ang nangita og sponsor alang sa libreng reception human sa kasal.
Si Lourdes Estella, ang mibayad sa pari aron mapahigayon ang libreng kasal. (BANAT NEWS)
- Latest
