Trabahador natabunan sa paril
CEBU, Philippines - Mohimo og imbestigasyon ang kapulisan sa Mambaling Police Station aron pagsusi kun kinsay manubag sa pagkatumba sa usa ka kongkretong koral diha sa Mambaling nga gikamatyan sa usa ka construction worker ug miangol og duha.
Si Senior Inspector Gerald Suquib ang hepe sa Mambaling Police, miingon nga ila pa nga gipalawman ang paghimo sa imbestigasyon, buot usab nilang mahibaw-an ang pamahayag gikan sa University of Cebu- Maritime Education Training Center ug ang Mitsubishi Showroom, apil sab ang Vinza Lima Construction nga gitrabahoan sa namatay nga si Ronnel Juson, 24, taga Ozamis City.
Kauban sa biktima ang laing 13 ka kauban nagkalot sa pundasyon sa maong building (Mitsubishi Showroom) dihang natumba ang koral.
Gawas kang Juson, naangol ‘sab sila si Elmeo Espinosa, 23, Stellbert Laurin Fernandez, 22.
Tungod sa maong hitabo, mipagawas ang Office of the Building Official sa siyudad og cease and desist order (CDO) kagahapon aron ipahunong ang construction. Si Cebu City engineer Jose Marie Poblete miingon nga kinahanglang mohatag og “incident report” ug “soil stabilization methodology” ang contractor.
Nasuta sa structure engineer nga humok ang yuta sa lugar nga maoy hinungdan sa pagkahugno sa pader. Ang maong application sa building permit wala pa maaprobahi tungod kay duna kini mga gagmay’ng kuwang. (BANAT NEWS)
- Latest
