Lupon positibo sa drug test

CEBU, Philippines - Tulo ka kawani sa barangay Santo Niño, dakbayan sa Sugbo nga naglakip sa usa ka sakop sa Lupong Tagapamayapa ang namatud-ang adik sa paggamit og gidili nga matang sa drugas.

Si Dr. Alice Utlang, hepe sa City Office on Substance Abuse Prevention (COSAP), miingon nga una’ng higayon kini nga adunay sakop sa Lupon nga napositibo sa drug test sa dakbayan. Bisan si Ernest Herrera III, executive director sa COSAP, miingon nga nasubo kaayo siya pagkasayod nga gawas sa duha ka garbage loaders nga unang napositibo sa drug test, naapil pa ang sakop sa Lupon.

Ang Lupon maoy gitahasan sa paghusay sa mga panagbangi sa mga lumolupyo sa ilang barangay ug matud ni Herrera angayan g’yud unta sila nga magsilble nga ehemplo sa ilang katagi-lumolupyo. Miabot na og 181 sa 4,348 ka kawani sa barangay nga napositibo sa kinalit nga drug test nga gihimo sa COSAP sa kapin sa 50 na ka barangay sukad sa sayo nga bahin niini’ng tuiga.

Daghan hinuon sa mga namatud-an nga adik nga kawani sa barangay wala lang gitaktak sa ilang serbisyo, ilabi na kadto’ng mga ilado kaayo nga alyado sa barangay kapitan.

Si Dr. Utlang miingon nga gusto g’yud unta nila nga karong buwana mahuman na ang pag-drug test sa mga kawani sa barangay. (BANAT NEWS)