Estudyanteng maglaroy-laroy dakpon

CEBU, Philippines- Mamahimo na unya’ng krimen sa dakbayan sa Talisay ang paglaroy-laroy sa mga estudyante gawas sa school campus panahon sa tingklase.

Kini sa higayun nga mapalabang na ang ordinansahon nga giduso ni Konsehal Aldin Diaz nga gitawag og "Talisay City Anti-Truancy Ordinance" nga tukion sa sesyon karong adlawa.

Matud ni Diaz nga iyang na-obserbahan nga kadaghanan sa mga estudyante, ilabi na mga high school, nga unta mosulod sa ilang klase apan naa na hinuon sa mga internet cafe ug maglaag-laag sa mga malls ug mga kalingawan panahon sa klase.

Gipasabot ni Diaz nga ang iyang ipapasar nga ordinansa magprotektar sa mga estudyante aron ang mga ginikanan nila nga naa sa ilang trabahoan ug sa panimalay dili mabalaka.

Ang mga offenders sa maong ordinansa naglakip sa mga estudyante nga naa sa publikong lugar o business establishments panahon sa tingklase; parents o guardians, maestra ug school authorities ug mga operator og business establishment diin nagtugot sa mga estudyante nga maglaag-laag.

Kung maaprobahan ang ordinansa sa konseho, aduna’y umolon nga Anti-Truancy Board.

Sa unang kalapasan, ang madakpan itugyan ngadto sa Social Welfare and Development Office para sa counseling.

Sa ikaduhang kalapasan, itugyan na ngadto sa barangay ug ang ginikanan, guardians, magtutudlo, business operators pahamtangan og multa. - /GMR) (BANAT NEWS)