Kamatayon sa polis sa Tagbilaran ipasusi

CEBU, Philippines-Gustong ipasubay karon sa hepe sa Police Regional Office (PRO 7) kung duna bay operational lapses ang mga polis nga miresponde sa alarma sa dakbayan sa Tagbilaran, Bohol nga miresulta sa kamatayon sa usa ka polis ug pagkaangol sa tulo human sila gitagsa-tagsa pagpusil sa usa ka drug suspect.

Si Chief Superintendent Prudencio Tom Bañas mimando na og usa ka imbestigasyon ma’y labot sa maong panghitabo aron masubay kung nasunod ba sa mga tamdanan ang maong mga polis pagtubag og alarma. Andam hinuon ang PRO-7 pagtabang sa mga nailo ni PO1 Michael Ejoc kinsa napusilan patay sa suspek nga si Artemio “Benjun” Tare Jr. kinsa napatay usab niadtong Sabado sa gabii sa Guindulman, Bohol.

Hinuon gihulagway ni Bañas nga natural lang gayud nga dunay susamang mga insidente maong iyang gipahimangnoan ang mga sakop nga sundon ang ilang training ug rules of engagement aron di na kini masubli pa.

Sa nasayran , ang  hepe sa PIB sa Bohol Chief Insp. Alvin Futalan mibutyag nga  nakagawas na sa tambalanan sila si PO2 Judito Jasmin ug PO1 Carlito Gamalo, apan giatiman pa gihapon si PO1 Reynan Tagotongan, human nga kritikal gihapon ang kondisyon bisan naoperahan na gumikan sa bala nga mi-ungot sa iyang ulo.

Human sa kamatayon sa usa ka pulis ug pagkaangol sa laing tulo ka pulis sa sakop sa Provincial Intelligence Branch sa Bohol,  gipahimangnoan ni Supt. Rodulfo Albotra ang mga sakop sa PIB-Cebu province nga  di gyud mokompyansa  kon motubag og alarma.

Matud pa ni Albotra kanunay gyud niyang gipahinumduman ang iyang mga sakop nga magbantay sa kanunay bisan magamay ug madako ang operasyon. - /EIM) (BANAT NEWS)